Madaxweynaha Somaliland Oo Si Weyn Loogu Soo Dhaweeyay Sallaxley Iyo Bali-gubadle
(maantasomaliland):-Madaxweynaha Somaliland Mudane Axmed Maxamed Maxamuud (Siilaanyo) iyo weftigii uu Hoggaaminayay ayaa maanta duhurkii soo gaadhay Magaaladda Sallexley oo si balaadhan loogu soo dhaweeyay.
Madaxweynaha Somaliland waxa uu degmadda Sallexley kulan kula yeeshay maamulka degmadaasi, waxgaradka iyo qeybaha kala duwan ee bulshadda oo ay iska xog-waraysteen xaaladda guud ee degmadda iyo horumarkeedaba.
Madaxweyne Axmed Siilaanyo waxa uu dhagax dhigay dhisme cusub oo lagu kordhinayo cisbitaalka Sallexley.
Wasiirka warfaafinta,dhaqanka iyo wacyigelinta Somaliland Mudane Cabdilaahi Maxamed Daahir (Cukuse) ayaa hadal uu ka jeediyay xaflad qado-sharaf ah oo Sallaxley loogu sameeyay weftiga Madaxweynaha, waxa uu tilmaamay in dadweynaha degmadaasi ay taageero la garab taagan yihiin Xukuumadda Madaxweyne Axmed Siilaanyo.
Madaxweynaha Somaliland Mudane Axmed Maxamed Maxamuud (Siilaanyo) waxa uu u mahad celiyay dadweynaha degmadaasi oo uu xusay inay si diiran soo dhaweeyeen. Waxaanu ku bogaadiyay horumarka ay gaadhay degmadaasi, isagoo balan-qaaday in xukuumaddiisu ay sii wado doonto sidii ay kaalin weyn uga qaadan lahayd horumarinta degmadda.
Madaxweyne Axmed Siilaanyo iyo weftigiisu waxa ay galabta gaadheen magaaladda Bali-gubadle ee xarunta gobolka Hawd, halkaasi oo loogu soo dhaweeyay si balaadhan. Waxaana soo dhaweynta Madaxweynaha ka qeyb galay maamulka gobolka, ka degmadda iyo boqolaal qof oo ka mid ah shacbiga ku dhaqan magaaladda Bali-gubadle.
Weftiga Madaxweynuhu waxay caawa u hoydeen magaaladda Bali-gubadle , waxaana lagu wadaa inuu halkaasi ka furo mashaariic horumarineed, qaarna dhagax dhigo.
xuseen xarbi
maantasomaliland
hargaysa/office
email/harbi_31@hotmail.com
tel:0634052413