Hargeysa(maantasomaliland) Mar.13, 2011 – Xubno Wasiiro ah oo ka tirsan xukuumadda Somaliland, ayaa maanta kulan kula yeeshay Magaaladda Hargeysa Wafti balaadhan oo ka socday dalka Norway. Kulankan oo ka dhacay hoolka shirarka Wasaaradda Beeraha ee Magaaladda Hargeysa, ayaa lagu gorfeeyay sidii loo horumarin lahaa mashaariicda dhinaca Beeraha, Khayraadka dabiiciga ah iyo wax soosaarka Dalka.

Dhinaca Somaliland shirkan waxa ka qayb galay ,Wasiirada Xanaadda Xoolaha Dr Cabdi Aw Daahir, Kalluumaysiga iyo Khayraadka Badda MD Cabdilaahi Jaamac Cismaan(Geejire),iyo Beeraha Md Faarax Maxamuud Cilmi (Geedoolle), Agaasimayaasha Guud ee Tacliinta sare iyo beeraha, halka dhinaca Waftiga Norwayna ay ka socdeen:Merit Hern AES,NPA-Norway iyo Mostafa pourbayat oo ka socday ururka kultur og kompetanse oo ka sheeqeeya horumarinta beeraha iyo wax soo saarka.

Wasiirka Kalluumaysiga iyo Khayraadka badda oo Warbixin ka siiyey Warbaahinta dalka waxyaabaha ay kawada hadleen waftigan iyo nuxurka ka soo baxay ayaa hadalkiisa wuxuu u dhignaa sidatan:-

“Kooxdani waa kooxdii dalka Norway ku baraarujisay in ay Somaliland wax u qabtaan waxaanay ka socdaan urur la yidhaahdo NVA oo ka soo jeeda gobal ka mid ah goboladda Norway oo ah ka ugu wayn dhinaca Wax soosaarka beeraha oo layidhaahdo (Head Mark) waxaanay halkan maanta wadaan in ay kormeer ku sameeyaan wixii ay inala qaban lahaayeen. Ugu horeyna waxaa uu yahay mid ay iminka in doora ka shaqaynayeen mudo gaadhaysa lix sanadood oo hada soo dhamaaday Maaligelintiisiina loo diyaariyey oo ah College Beeraha ah oo laga Hirgelinayo degaanka Cadaadlay,kaas oo ay doonaayeen qaybta ay xukuumadu ka qaadanayso iyo qorshaha oo dhamaystiran in ay sii qaataan.

Waxaa kale oo ay inaga caawin doonaan Wasaaraddaha Beeraha, Deegaanka,Xanaanada Xoolaha iyo Khayraadka bada,waayo dalka Norway waa dalka aduunka ugu horeeya dhinaca kaluumaysiga oo khibrad dheeraad ah ayaa ay u leeyahiin wax soosaarka badda,iyaga oo dhiiri gelinaya Shaqaalaysiinta dhalinyaradda iyo dumarka, ee dhinaca Xeebaha,waxaa kale oo ay shirkan ku cadeeyeen in ay Norway diyaar utahay in ay wax la qabato Somaliland”.

xuseen xarbi

hargaysa