Suxufiyiin Ciidanka Madaxtooyaddu Ku garaaceen Cisbitaalka Hargeysa Markii Madaxweynuhu Marayay

Hargeysa (maantasomaliland)-Ciidanka ilaalada Madaxtooyada Somaliland, ayaa maanta si arxandaro ah u garaacay laba weriye oo ka hawlgala warbaahinta madaxabannaan ee dalka.

Labadan suxufi ayaa kala ah Xamse Cali Bulbul oo ah madaxa wararka ee Telefishanka caalamiga ah ee Horn Cable iyo Cabdirixiin Ismaaciil Bidaar oo ka hawlgala shabakeda wararka ee Togaherer, wakhtigaas ay suxufiyiintan ay ku sugnaayaan cisbtaalka guud ee Magaalada halkaas oo uu booqanayay Madaxweyne Siilaanyo, waxaana weerar aan la garanayn u jeeda ka dambaysay ku soo qaaday qaar ka mida ilaalada Madaxtooyada oo ku garaacay qoryo iyo budhadh ay siteen ,iyada oo ay goobtaas ay ka ag dhawaayeen masuuliyiin ka mid ahaayeen Chief of cabinetka Madaxtooyada, afhayeenka Madaxweynaha iyo masuuliyiin kale oo xukuumada ka tirsan.

Weriye Cabdixiin Ismaaciil Bidaar oo shabakeda wararka ee Ramaas wax waydiisay sida ay wax u dhaceen, ayaa sheegay koox askar ah ay soo weerartay weriye Xamse Bulbul, balse markii dambe ay isagana qabteen askartu oo ay ku garaaceen qori dabadii ka dib markii uu sawiro ka qaaday dhibaatada ay askarta u gaysanayeen suxufigaas, waxaana uu yidhi isaga oo arrintaas ka hadlaya” Saaka markii aanu wax duubaynay Madaxweynaha ayaan arkay Xamse Cali Bulbul oo ay dilayaan ciidanka Madaxtooyadu dabadeed sawiro ayaan ka qaaday weriyaha isla mariiba waxa i qabtay niman askar ah oo si fool ii karbaashay waxa igu yaala nabaro oo waa kuwaas”

Maaha markii ugu horaysay ee ilaalada Madaxtooyada ay xadgudubyo fool xun kula kacaan suxufiyiinta ka hawlgasho warbaahinta madaxbanaan, iyada oo jeer oo hore la soo calaamadiyeyay xadgudubyo noocan oo kale ah.