Saraakiisha Kooxda Khaatumo State Oo Booqday Deegaanka Sooljoogta Ee Dagaalku Ka Dhacay Toddobaadkii Hore Iyo Ciidamada Somaliland Oo Heegan Sare La Geliyay.
(mantasomaliland.com) Qaar ka mida madaxda sare ee maamulka kooxda Khaatumo State, ayaa maanta booqasho ku tagay deegaanka Sooljoogta oo ah xudunta dagaalkii toddobaadkii hore dhexmaray ciidamada Qaranka Somaliland iyo kuwa maliishiyada beelaha dega Buhoodle, waxaana sida la sheegay ay soo mareen meelo ka mida goobihii dagaalku ka dhacay.
Masuuliyiintan ayaa wada qorshe dagaal oogida oo ku dhiirigelinayaan dadka reer miyiga ee ku nool deegaankaas, waxaana ay kulamo la yeesheen odayaasha dhaqanka oo wadahadlayeen muddo dhawr saacadood, isla markaana waxa ay labada dhinac isla meel dhigeen in si wadajir loo wajaho duulaamo ay sheegeen in ay kaga imanayaan dhanka ciidanka Qaranka Somaliland oo jiidaas ku leh fadhiisimooyin kala duwan,iyada oo laga cabsi qabo dagaal qarxa mar kale.
Waxaana ay socdaal ku mari doonaan dhul ballaadhan oo ay ka taliyaan ciidamo ka amar qaata beelo , iyaga oo sida la sheegayo madaxda dhaqanka waydiisanaya ciidamo iyo dhaqaale oo ku hirgeliyaan awoodooda maamul oo xilligan magac u yaal , waxaana ay adeegsanayaan odayaal xubno ka ah maamulka Khaatumo State, kuwaas oo bilaabay wacyigelin hor leh.
Dhinaca kale ciidamada Somaliland ee ku sugan jiida Sooljoogta, ayaa la sheegay in la geliyay heegan sare , iyaga si gaar ah isha ugu haya dhaqdhaqaaqyada falaagada oo kor u kacay labadii maalmood ee dambeeyay , taasoo xiisada taagan uga sii dari karaysa.
Ciidamada , ayaa wararka qaar sheegayaan in ay ka ruqaansadeen fadhiisimooyinkooda, si ay isaga caabiyaan weerar kaga yimaada maliishiyada ka soo horjeeda oo soo qaadi karta weeraro ku dhufo- oo ka dhaqaaq ah,kuwaas oo sababi kara khasaare ballaadhan oo ah dagaalada ay qaadaan jabhada oo aan awooda badan lahaynin, laakiin waxa aan la ogayn waxa dhici doono saacadaha soo socda.
Xukuumada Somaliland, ayaa maanta shaaca ka qaaday in ay dib u dhigtay xuska maalinta ciidanka Qaranka oo ku beegan labada bishan Febuary oo ku beegan maalinta beri ah ee Khamiista, iyada oo aan la cadayn sababta rasmiga ah ee keentay dib u dhigista,laakiin waxa loo badinayaa in ay la xidhiidho dagaalada ka jira Bariga wadanka, gaar ahaan kuwa ka socda jiida Buhoodle
muuse